Babu wata alama da ta nuna a zahiri cewa an kaddamar da samamen kama bakin hauren da yawansu ya kai dubu 2,000 da ke zaune a nan Amurka ba bisa ka’ida ba, wadanda ake nufin mayar da su kasashensu na asali.
A jiya Lahadi hukumomin Amurka suka bayyana cewa za su kaddamar da samamen na cafke bakin hauren.
Mukaddashin hukumar shige da fice da kuma ta Kwastam, Chief Matt Albence ya ce, “akwai rukunin mutanen da muke kaikaita wadanda kotun shige da fice ta saurari kararrakinsu kuma alkali ya ba su umurnin su fice daga kasar.”
Sai dai bai ba da cikakken bayanin kan inda aka yi kamen ba ko kuma mutane na wa ake tsare da su.
Amma fargabar da bakin haure ke ta nunawa na kai samame gidajensu a manyan biranen kasar ba ta bayyana ba, domin ba a ga jami’an tsaron suna fasa kofofin gidajen bakin hauren suna kama su ba.
Facebook Forum