A fadan su, wannan mataki ya haddasawa harakokin kasuwancinsu, saboda rashin shigowar kayayyakin da suka yi oda daga gida, yayinda aka fara fuskantar hauhawar farashin ababen masarufi a kasuwanin kasar Nijar.
Shigo da kaya kirar kamfanonin Najeriya domin sayar dasu a kasuwannin Nijar sana’a ce da wasu ‘yan Najeriya suka dogara da ita shekara da shekaru. Sai dai matakin rufe iyakoki da gwamnatin shugaba Buhari ta dauka a tsakiyar watan jiya, ya jefa irin wadanan ‘yan kasuwa cikin zullumi, sakamakon tsayarwar harakoki kamar yadda suka shaida wa wakilin Muryar Amurka lokacin da ya zagaya kasuwar.
Girman matsalar da aka shiga a yau ya sa kungiyar ‘yan Najeriya mazauna Nijar kiran gwamnatin Muhammadu Buhari da ta dubi halin da wadanan ‘yan kasar ke ciki sanadiyar rufe iyakoki.
Bayanai daga yankunan dake makwaftaka kut da kut da jihohin Arewacin Najeriya na nunin farashin ababen masarufi ya tashi sama, saboda haka jami’in kare hakkin jama’a Salissou Amadou na Sauvons Le Niger ke jan hankula don ganin an tausawaya talakka.
Koda yake hukumomin Najeriya na alankata wannan mataki da yunkurin dakile barauniyar hanyar masu fasa kwabri, da masu safarar makamai da myagun kwayoyi, wata majiyar gwamnatin Nijar na cewa ba su yi zaton haka abin zai zo da tsauri ba.
Ga cikakken rahoton daga wakilin Muryar Amurka Souley Moumouni Barma.
Facebook Forum