Shugabannin APC da suka fito daga mazabar kakakin Majalisar Wakilai Yakubu Dogara sun mika wasikar kokensu ga ofishin jam’iyyar dake Bauchi dake dauke da sa hannun mutane 18.
Muhammad Hassan mukaddashin shugaban jam’iyyar na jihar Bauchi ya shaidawa Muryar Amurka cewa wakilan mazabar Yakubu Dogara sun kawo korafi ne akan abun da yace su ma ya damesu. Sun kawo rashin amincewarsu ne ga yunkurin majalisun Najeriya biyu na neman tsige shugaban kasa.
Mutanen mazabar na kananan hukumomin Dass, Bogoro da Tafawa Balewa sun bukaci Yakubu Dogara ya cire hannunsa daga duk abun da ya shafi takun saka tsakanin shugaban kasa da ‘yan majalisa. Idan kuma ya ki su mutanen nasa suna da matakin da zasu dauka a kansa.
Amma wasu hadiman kakakin majalisar wakilai, Yakubu Dogara, su gana da manema labarai domin bada tasu bahasin. Dar Abdu Gani Bogoro yace tun kafin a yi zabe Yakubu Dogara ne wakilin Shugaba Buhari a Lagos. Baicin haka lokacin da shugaban kasa bashi da lafiya Yakubu Dogara ya tabbata ba’a taba kujerarsa ba. Ya kara da cewa lokacin neman zabe Yakubu Dogara yana shiga mijami’u yana kemfen cewa duk wanda ba zai zabi Buhari ba kada ya zabeshi. Dr Bogoro y ace tsakanin Buhari da Dogara kamar Danjuma da Dan Jummai ne.
Shima Iliyasu Ibrahim Zor yace shi ne yake tallafawa Yakubu Dogara akan harkokin majalisun jihohi da kananan hukumomi. A cewarsa irin maganganun dake fitowa basu da tushe saboda shi ya san babu yadda za’a hada baki da Yakubu Dogara domin a ci mutuncin shugaban kasa. Yace batanci ne ba wani abu ba.
Abdulwahab Muhammad nada karin bayani
Facebook Forum