Babban Hafsan sojojin saman Najeriya Air Marshall Sadique Abubakar, ya tare a jihar Zamfara, inda yake sa ido a kan farmakin da sojojin sama ke kaiwa ‘yan bindiga da barayin shanu dake kashe mutane kusan kullum a Jihar.

A ‘yan kwanakin nan ne ‘yan bindigar suka zafafa kai hare hare a garuruwa da kauyuka a jihar Zamfara, inda suka saka daruruwan mutane suka tsere daga gidajan su, al'amarin da ya sa sojojin saman Najeriya suka dauki alkawarin kawar dasu.

Babban Hafsan sojojin saman ya ce daga lokacin da suka fara kai farmakin zuwa yanzu ya gamsu da irin nasarar da ake samu wajan murkushe ‘yan bindigar da kuma barayin shanu a jihar ta Zamfara da kuma jihohi makwabta.

Kakakin rundunar mayakan saman ta Najeriya, Air Commodore Ibikunle Daramola, ya ce sun sami bayannan sirri na wani babban sansanin ‘yan bindiga a Tsamari dake karamar hukumar Birnin Magaji, wanda nan take aka tura jiragen yaki samfurin Alpha Jet, inda suka rugurguza sansanin nasu tare da karkashe baki dayan ‘yan bindigar dake wurin wadanda ke dauke da manyan makamai.

Saurari cikakken rahoton Hassan Maina Kaina: