Wannan yajin aikin ya shafi dukan asibitoci da cibiyoyin kula da kiwon lafiyar al’uma na gwamnatin tarayya da na jihohi wadanda likitoci masu neman kwarewa ke aiki a cikin su.
Matakin dai ya biyo cikar wa’adin da kungiyar likitocin ta baiwa gwamnatin tarayya ne na ta biya bukatun ‘ya ‘yanta wadanda suka hada da wadatattun kayan kariya daga cutuka masu saurin yaduwa irin Coronavirus da batun samar da kudaden bincike da nazari.
Dr Abubakar Nagoma Usman, shugaban reshen asibitin koyarwa na Aminu Kano, ya bayyana damuwa a kan rashin dora ma’aikatan kiwon lafiya a kan inshoran lafiya duk da hadarin dake tattare da aikin suna yaki da cukuta masu yaduwa kamar Ebola da Lassa da kuma Coronavirus.
Sai dai shugabar sashin hulda da Jama’a na Asibitin koyarwa na Aminu Kanon, Hajiya Hawa Abdullahi ta ce hukumar asibitin ta cimma wata matsaya da kungiyar domin rage radadin yajin aikin akan marasa lafiya.
Sai dai duk da cewa, kwararrun likitoci da sauran ma’aikatan kiwon lafiya na ci gaba da aiki kamar yadda aka saba, akwai yuwuwar wannan yajin aiki ya yi mummunan tasiri akan tsarin kiwon lafiyar ‘yan najeriya, la’akari da cewa, adadin wadanda ke yajin aikin ya kai kimanin kashi 60% cikin dari.
Ga rahoton Mahmud Ibrahim Kwari daga Kano:
Facebook Forum