Korea Ta Arewa Ta Yi Sabon Gwajin Makami

Da sanyin safiyar yau ne Korea ta Arewa ta cilla wani makami mai linzami wanda har ya gitta ta sararin samaniyar kasar Japan.

Wannan gwaji na baya-bayan nan, ya haifar da damuwa tsakanin Japan da kasar Korea ta kudu.

Minti 10 da harba wannan makami a sararin samaniyar kasar Japan ya tarwatse gida uku ya fada cikin Tekun Pacific da ke gabas maso arewacin tsibirin Hokkaido na kasar ta Japan, kamar yadda gwamnatin kasar ta fada.

Sai dai harba wannan makamin bai zame ko wacce irin barazana ba ga kasashen arewacin Amurka kamar yadda Sojojin Amurka suka fada.