Har yanzu an kasa cimma matsaya dangane da kasafin kudin Amurka

Shugaban Amurka Barack Obama yace shi da manyan shugabannin majalisa daga jam’iyun biyu sun sami ci gaba a tattaunwar da suke yi domin kawo karshen cijewar da aka samu kan kasafin kudi. Duk da haka yace da sauran aiki,ana sauran kwana daya kamin kudaden aikin gwamnati su kare. Mr.Obama ya gayawa manema labarai a daren jiya Alhamis cewa, ba zai ce yana da cikakken kwarin guiwar cewa gwamnati ba zata tsaida ayyukanta sakamakon rashin kudi ba.Sai dai bai bayyana wadanne irin matsaloli ne ba’a shawo kansu ba a shawarwarin da ake yi.Kalaman shugaban na Amurka ya biyo bayan shawarwari tsakaninsa da shugaban masu rinjaye a majalisar dattijai Harry Reid,da kakakin majalisar wakilai John Boehner. Wannan ce ganawarsu ta hudu cikin kwanaki uku, a ci gaba da shawarwari babu kakkauntawa da nufin tsara shirin kasafin kudi har zuwa karshen shekarar kudin bana a watan Satumba. Idan majalisar dokoki ta gaza amincewa da kasafin kudi zuwa tsakar daren yau jumma’a, to tilas gwamnatin Amurka ta tsaida aiki.