Gangamin Jam'iyyar ACN a Legas

WASHIGTON, DC —  A cigaban shirinta na hadewa da sauran jam'iyyun hamayya, yau ACN ta yi babban gangami a Legas wanda ya tattaro manyan yan jamiyyar daga sassa daban-daban a Najeriya. Mutane da suka halarci taron sun hada da tsofofin gwamnoni kamar su Alhaji Lateef Jakande da ma shugaban CPC General Mohammed Buhari.

Lokacin taron shugabanninta sun nemi izinin membobi su rushe jam'iyyar domin su hade da sauran yan hamayya a kafa sabuwar jam'iyyar APC. Mambobi sun nuna amincewarsu daga hannuwansu.

Yayin da yake jawabi Alhaji Jakande yace hadewarsu ita ce hanaya kadai da za'a iya kada PDP wadda ya kira jam'iyyar barayi. Shi ma Genral Buhari ya yi jawabi ya kuma yarda da kalamun Alhaji Jakande.

Daga yanzu dai babu jam'iyyar ACN a hukumance. Mambobi sun sa ido suna jiran INEC ta yi masu ragistar APC.