Mutane 3 sun hallaka sakamakon fashewar tankar mai a gadar Saman Obiri zuwa Ikwerre dake kan hanyar gabas zuwa yamma ta birnin Fatakwal, fadar gwamnatin jihar Rivers a yau Talata.
Al’amarin daya afku da misalin karfe 9 da rabi na safiya ya hada da wata tanka da ake zargin tana dauke ne da iskar gas wacce ta latse wata karamar mota tare da tarwatsewa a yayin da take kokarin shiga shatale-tale.
Da yake tabbatar da afkuwar lamarin a wata hirar wayar tarho, kakakin rundunar ‘yan sandan jihar, Grace Iringe-Koko, tace wadanda al’amarin ya rutsa dasu sun kone kurmus sa’ilin da tankar ta afka kan motar da suke tafiya a ciki.
An ruwaito ta tana cewar, “ina tabbatar da cewar mutane 2 sun mutu a gobarar tankar. Ni da kwamishinan ‘yan sandan jihar muna wurin da al’amarin ya faru a halin yanzu.”
“An yi nasarar kashe gobarar saidai har yanzu wurin nada hatsari saboda da gas din dake yoyo. don haka muke kira da masu ababen hawa dasu bi wasu hanyoyin ddomin kaucewa shiga hatsari.”
A yayin hada wannan rahoto, jami’an kashe gobara sun shawo kan wutar a yayin da dandazon jama’a suka taru domin kallo cikin tsauraran matakan tsaro.
Dandalin Mu Tattauna