Rundunar sojin sama ta Najeriya ta ce ta tura dakarunta na musamman zuwa Kaduna da ke arewa maso yammacin kasar domin su kara tallafawa tsaro a jihar.
Wata sanarwa dauke da sa hannun Kakakin rundunar, Air Commodore Ibikunle Daramola, ta ce a ranar Lahadi aka tura dakarun, da zimmar dakile hare-haren da ake samu a wasu yankunan jihar.
Sanarwar ta kara da cewa, wannan karin dakaru, za su tallafawa jirage masu saukar ungulu biyu da aka tura domin tattara bayanan sirri.
Wadannan jirage a cewar rundunar ta sojin sama, suna ta sintiri a yankunan da aka fi samun tashin hankali kamar yadda jaridun kasar da dama suka ruwaito.
Jihar Kaduna ta sha fama da rikici mai nasaba da addini da kablianci a 'yan kwanakin nan inda aka yi asarar rayuka da dukiyoyi da dama.
Yanzu wasu yankunan jihar na karkashin dokar hana zirga zirga.
Facebook Forum