Kwamandan Jami’an tsaron farin kaya na cilvil defense a jihar Yobe Dr Muhammed Fari ya ce, sun cafke wani kurma, Shua’ibu Danladi mai shekaru 40 da haihuwa a sakamakon yiwa yarinya ‘yar watanni shidda da haihuwa fyade a Potiskum.
Shugaban rundunar jami’an tsaron farin kayan wanda ya bayyana karuwar aikata laifuka irin su fyade, cin amana da sauran laifuka makamantan su a jihar, ya ce sakamakon binciken asibiti ya tabbatar da cewar jaririyar ta sami rauni a gabanta.
Mujallar Daily Trust ta wallafa cewa kwamandan ya bayyana cewa yanzu haka jaririyar tana asibitin koyarwa na jami’ar Maiduguri inda take amsar magani.
Kwamandan ya bayyana cewa sun tura jama’a da dama da suka aikata laifuka makamantasu kotu, ya kara da cewa kotun ta fuskanci matsala wajan sauraron karar sakamakon rashin wanda ya kware akan fassara ko maganar kurame a kotun.
Ya ce akwai irin wadannan jama’a da dama dake fuskantar shari’a a kotun Majistire dake Damaturu.
