Mayakan kungiyar Boko Haram sun kwace garin Damasak, hedkwatar karamar hukumar Mobbar ta Jihar Borno, wadda ke dab da bakin iyaka da Jamhuriyar Nijar.
Mutane a garin na Damasak da kuma wasu majiyoyin tsaro sun ce jiya litinin tsageran suka kafa tutocinsu a cikin wannan gari, bayan da aka shafe sa'o'i ana gwabza fada a tsakaninsu da jami'an tsaro.
'Yan Boko Haram din, wadanda daga farko suka yi shiga kamar 'yan kasuwa, sun fara dira a cikin kasuwar garin, inda suka bude wutar kan mai uwa da wabi, suka kashe mutane da dama.
Garin na Damasak, shi ne na baya-bayan nan a cikin garuruwan da suka kwace cikin 'yan watannin nan a Jihar Borno, ciki har da Bama, Gwoza, Gamboru da wasunsu.
Har yanzu ba a ji ta bakin rundunar sojojin Najeriya kan wannan ba.
