Yau Alhamis, iyalan margayi tsohon shugaban Amurka suke bankwana da shi.
WASHINGTON DC —
A yau Alhamis, dangin George Hubert Walker Bush za su yi ban-kwana na karshe da Shugaban Amurka na 41, a wata jana’iza da za a yi a garin Houston da ke jihar Texas.
Jirgin da ya dauki gawar tsohon shugaban daga Washington DC ya isa birnin Houston da yammacin jiya Laraba.
An kuma ajiye gawarsa a cocin St. Martin Episcopal, inda ya kwana domin a ba jama’a damar kallon akwatin da ke dauke da gawarsa, wanda aka rufe shi da tutar Amurka.
Bayan jana’izar sa, wacce mutane kalila ne za su halarta, za a dauki gawar a wani jirgin kasa na musamman. Za a yi tafiyar kilomita 120 da ita zuwa inda za a birne gawarsa, a wani dakin karatu da ake kira da sunan shi da ke Jami’ar Texas ta A&M.