Westham United Ta Farauto David Moyes

WASHINGTON DC — 

Hukumar gudanarwa na kungiyar kwallon kafa ta Westham United, dake kasar Ingila ta bayyana sunan tsohon wanda ya taba horar da kungiyar Everton, da Manchester United, David Moyes, a matsayin sabon mai horar da ‘yan wasan ta.

David Moyes, ya maye gurbin Slaven Bilic, ne wanda kungiyar ta sallama a ranar litinin 6, ga watan Nuwamba 2017, bayan wasan su da kungiyar kwallon kafa ta Liverpool, inda ta lallasa ta da kwallaye 4-1 a gidan, a gasar Firimiya lig na bana.

Kungiyar ta Westham ta kasa tabuka wani abun kirki a bana domin a wasanni goma sha daya da ta buga a gasar Firimiyar kasar Ingila ta samu nasara a wasanni biyu kacal sai kunnen doki sau uku an doketa a sauran wasannin.

A halin yanzu dai kungiyar na mataki na sha takwas a kasan teburin Firimiya lig da maki tara.

David Moyes zai fara wasansa na farko a kungiyar Westham, a wasan da kungiyar zata kara da Watford, na Firimiya lig mako na sha biyu ranar lahadi.

Westham United Ta Farauto David Moyes - 2'51"