Shugaba Barack Obama na Amurka wanda yake tattaki yau Talata zuwa birnin Dallas a Jihar Texas, yana fuskantar tsaka mai wuya wajen yin magana gefe guda ga jami’an ‘yan sanda dake jimamin mutuwar abokan aikinsu, a daya gefen kuma ga shugabannin kare hakkin bakar fata wadanda su ma suke son a maida irin wannan hankalin ga yadda ‘yan sanda suke kashe bakaken fata.
Shugaba Obama da mataimakin shugaba Joe Biden da kuma tsohon shugaba George W. Bush zasu hallara a wannan birni inda wani dan harbin kwanton bauna ya bindige ‘yan sanda 5 har lahira, ya kuma raunata wasu 4 tare da farar hula 2 lokacin wata zanga zangar lumana a makon jiya.
Wani babban fada a Dallas, Rev. Frederick Haynes, ya fadawa shugaba Obama cewa yana goyon bayansa sosai, amma kuma yana son yayi tattaki har zuwa Minnesota, watau daya daga cikin wuraren da ‘yan sanda suka kashe bakaken fata na baya bayan nan.
Gobe laraba, gwamnati zata hada jami’an ‘yan sanda, da ‘yan raji da masana da kuma masu rajin kare hakkin mutane a fadar White House domin Tattauna hanyar da za a iya samo mafita daga wannan lamarin.