Hajiya Zainab Musa Booth, mahaifiya ga jarumar masana’antar Kannywood da Nollywood Maryam Booth ta rasu.
Marigayiya Zainab, wacce ita ma tsohuwar jaruma ce da ke fitowa a matsayin uwa a fina-finan na Kannywood, ta rasu ne a daren Alhamis za kuma a yi jana’izarta a ranar Juma’a.
“Allah ya yi wa Hajiya Zainab Musa Booth rasuwa, gobe za a yi jana’iza a gidanta da ke kallon Premeire Hospital a Court Road da karfe takwas. Allah ya jikanta da rahama” In ji Jarumi Ali Nuhu, kamar yadda ya wallafa a shafinsa na Instagram.
Tuni jaruman masa’antar ta Kannywood maza da mata suka yi ta mika sakonnin ta’aziyyarsu ga iyalan marigayiyar.
“Allah ya gafarta miki da rahamarsa, ameen” Ramadan Booth ya rubuta a shafinsa na Instagram.
“Muna mika sakon ta’aziyyarmu ga iyalanta. Allah ya yafe mata kurakurenta.” In ji jaruma Daso.
“Allah ya jikan mommy mama zee, rayu kenan. Allah ya sa idan ta mu ta zo mu cika da imani ya rabbi.” In ji Rashida Mai Sa’a.
A ‘yan watannin baya, Maryam Booth ta wallafa a shafinta na Instagram cewa a taya mahafiyarta da addu’a saboda za a yi mata aiki.