An shigar da karar ne yayin da ake gurfanar da shi a gaban wata babbar kotun tarayya da ke Abuja.
An tuhumi Gambaryan, wanda ke jagorantar Kamfanin Binance a bangaren abubuwan da suka shafi bin doka da oda na fannin hada-hadar kudade a kamfanin a Najeriya, tare da musayar da Nadeem Anjarwalla, manajan yankin Afirka na Kenya wanda ya tsere daga tsare kwanaki kadan da tsare su da gwamnatin Najeriya ta yi.
FILE PHOTO: Illustration shows representations of cryptocurrency Bitcoin
Gambaryan, wanda da farko bai shigar da kara a gaban kotu ba, ya fuskanci tuhumar kin biyan haraji da kuma karkatar da kudade sama da dala miliyan 35,400.
Hukumar EFCC ta zarge shi tare da Binance da boye hanyar samun kudaden shiga da ake samu ta hanyar musayar cryptocurrency a Najeriya, inda ake zarginsa da aikata wani abu da ya sabawa doka.
Shari’ar kotun ta fuskanci cece-kuce game da tuhumar da ake yi wa Binance Holdings Limited. Lauyan Gambaryan, Mark Mordi, ya nuna rashin amincewarsa, yana mai cewa :
“Binance, wanda aka jera a matsayin wanda ake tuhuma na 1, ya kamata a yi aiki da shi kafin Gambaryan ya karɓi na shi” inji Mordi
Lauyan ya dage cewa tun da laifin hadin gwiwa ne, dole ne a kai kamfanin kafin a gurfanar da wanda yake karewa. Ya ce wanda yake karewa ba wakili ne na kamfanin cryptocurrency a Najeriya ba.
Duk da haka, EFCC ta ci gaba da cewa Gambaryan, a matsayin wakilin Binance a Najeriya, zai iya aiki a madadin kamfanin.
Mai shari’a Emeka Nwite, wanda ke jagorantar shari’ar, ya yanke hukunci a gaban EFCC, inda ya bayyana cewa Gambaryan ya cancanta a matsayin wakilin Binance a karkashin sashe na 478 na dokar shari’a ta manyan laifuka. Don haka, an umurci Gambaryan da ya shigar da karar, inda ya musanta aikata laifin.
Kotun ta ci gaba da tsare Gambaryan a gidan yari na Kuje har zuwa lokacin da za a yanke shawarar neman belinsa. Alkalin kotun ya sanya ranar 18 ga Afrilu, 2024 don sauraron karar neman belin, yayin da ya sanya ranar shari’ar a ranar 2 ga Mayu, 2024.
Ita dai wannnan shari'ar ta nuna karuwar binciken da ake fuskanta na mu'amalar cryptocurrency a duniya, tare da hukumomin da ke neman magance matsalolin da suka shafi hada-hadar kudi, kaucewa haraji, da sauran laifuffukan kudi masu alaka da kadarorin dijital.
~ Yusuf Aminu Yusuf