WASHINGTON D.C. —
Iran tayi gwajin wani makami mai linzami dake tafiyar matsakaicin zango, a cewar wani jami’in sojan tsaron Amurka, wanda ya kara da cewa hakan zai iya zafafa zaman dar-dar din da ake ciki a yankin tekun Gulf.
Jami’in wanda bai so a fadi sunansa ba, ya ce a shekaran jiya Laraba Iran ta cilla wannan makamin mai suna Shahab-3, koda ya ke ance makamin bai kasance wata barazana a kan jiragen ruwan da ke shawagi a tekun ba, balle kuma sansanonin sojojin Amurka da ke yankin.
Wannan al’amarin yana faruwa ne yayin da ake cikin zaman dar-dar a yankin a sanadiyar hare-haren da aka rinka kaiwa kan jiragen ruwa masu jigilar man fetur da kuma jiragen sama marasa matuka.