Kotun ɗaukaka ƙara da ke zamanta a birnin tarayya Abuja ta soke zaɓen Abubakar Sulaiman saboda a cewarta yana cike da kura-kurai inda ta bayar da umarnin a sake zaɓe a rumfuna 10 na mazaɓar Ningi.
Yan majalisar sun zaɓi ɗan majalisar da ke wakiltar mazaɓar Hardawa, Babayo Muhammad a matsayin sabon kakakin majalisar.
Hakazalika, sun kuma zaɓi ɗan majalisa mai wakiltar mazabar Dass, Ahmad Abdullahi, a matsayin mataimakin kakakin majalisar.
Kotun daukaka ƙara da ke zamanta a Abuja, a wani hukunci da ta yanke, ta soke zaɓen mataimakin kakakin majalisar, Jamilu Umarau Dahiru, mai wakiltar mazaɓar Bauchi ta Tsakiya.
Za a sake gudanar da zaɓe a wasu rumfunan zaɓe na mazabun tsohon kakakin majalisar da mataimakinsa domin tantance waɗanda suka lashe lashe zaɓen.
A halin yanzu, Gwamnan Jihar Bala Mohammed, zai gabatar da kudirin kasafin kudin jihar na shekarar 2024 ga majalisar a ranar Alhamis.