Allah ya yi wa fitaccen jarumin fina-finan Hausa, Usman Baba Pategi, wanda aka fi sani da Samanja Mazan Fama rasuwa yana da shekaru 84 a duniya.
Washington DC —
Shahararren jarumin Kannywood mazaunin Kaduna ya rasu ne da misalin karfe 12:15 na safe a ranar Lahadi 12 ga watan Nuwamba.
Daya daga cikin ‘ya’yan marigayin, Mohammad Usman, shine tabbatar da rasuwarsa, inda ya bayyana cewa ya bar mata biyu da ‘ya’ya 12.
Har yanzu dai ba a bayyana musabbabin rasuwarsa ba kamar yadda dansa ya ce an yi sallar jana'izar ne a wani masallaci da ke Kabala Costain a Kaduna.
Usman ya shahara a shirye-shiryen talabijin tun cikin shekarun 1980, wanda ya saba da sunan Samanja.
Usman ya kasance tsohon jarumin fina-finai kuma tsohon jarumin yaki, wanda ya yi yakin basasar Najeriya a karkashin marigayi tsohon shugaban kasa na mulkin soja, Janar Sani Abacha, wanda a lokacin yana karamin matsayi.