Bayanai dai sun nuna hare-haren guda ne aka kai a kananan hukumomin shiroro da kuma Rafi, kamar yadda Malam Jibrin Erana ya bayana wa Muryar Amurka.
Shi ma dai tsohon shugaban karamar hukumar Shiroron, ASP Yarima Abdullahi Mai Ritaya ya ce akalla mutane 8 ne suka rasa rayukansu a wannan hari.
A yankin karamar hukumar Rafi ma maharan sun yi garkuwa da gomman mutane daga kasuyen Tungan Bako, in ji wani mazaunin yankin da ya nemi a sakaya sunansa.
Haka zalika a karamar hukumar Mariga, rahotanni sun nuna cewa sojojin Najeriya hudu sun rasa ransu a wata arangama da 'yan fashin dajin.
Hukumomi a jihar Nejan dai sun tabbatar da kai wadannan hare-hare kuma suna daukar matakin shawo kan lamarin in ji sakataren gwamnatin jihar Nejan, Alh. Ahmed Ibrahim Matane.
Kawowa lokacin hada wannan rahoto dai babu wani karin haske daga rundunar 'yan sanda ta jihar Neja akan wadannan hare-hare.
