Fadar Gwamtin Amurka ta White House, na shirin kaddamar da wani sabon tsarin yi wa ma’aikatan fadar gwajin cutar COVID-19 a kullum, maimakon mako-mako da aka saba yi.
Matakin na zuwa ne bayan da wani daga cikin ma’aikatan da ke hidimar zubawa Shugaba Donald Trump abinci ya kamu da rashin lafiya aka kuma gwada shi aka gano yana dauke da cutar.
Yayin da yake ganawa da manema labarai a ofishinsa a jiya Alhamis, Shugaba Trump ya ce “bai yi wata mu’amullar a-zo-a-gani da mutumin ba.
Trump wanda ya kwatanta lamarin a matsayin “banbarakwai” ya kara da cewa masu hidimar zuba mai abinci da sauran ma’aikatan fadar duk sukan sa takunkumin rufe baki da hanci a kowanne lokaci.
Yayin kuma da yake amsa tambayar wani dan jarida, shugaban na Amurka ya ce mai dakinsa Melania da dansa Barron “duk suna cikin koshin lafiya.”
Shi ma Mataimakin Shugaban kasa Mike Pence ya fada wa manema labarai a jiya Alhamis cewa, daga yanzu a kullum za a rinka gwada su, shi da Shugaba Trump.