WASHINGTON, D.C —
Kafar yada labaran gwamnatin Syria ta SANA ta ambaci wata majiyar soja na cewa farmakin ta sama ya yi sanadiyyar kisan sojoji 3 tare da jikkata wani. Ta kira hare-haren “tsokana daga Isra’ila.”
A wata sanarwa da Isra’ila ta fidda ta zargi wata tawagar sojojin Syria a karkashin jagorancin dakarun Iran da girke ababen fashewa. Ta ce harin na ramuwar gayya ya auna rumbunan ajiya, da harabar sansanonin soja da kuma makaman kariyar Syria ne.
“A shirye muke mu maida martini kan duk wani kutse a Syria,” a cewar sanarwar sojojin.
Iran kasar huldar shugaban Syria Bashar al-Assad ce kuma ta tura sojoji masu bada mashawara da mayakan kawance don su taimaka wa dakarun Syria a lokacin yakin basasar kasar.
