Shugaban Amurka Donald Trump ya ce Turkiyya za ta murkushe sauran ‘yan ta’adan ISIS a Syria, bayan Amurka ta janye sojojinta.

Jiya Lahadi, Trump ya rubuta a shafinsa na twitter cewa, Shugaban Turkiyya Recep Tayyib Erdogan, ya jaddada masa cewa zai murkushe abun da ya rage na mayakan ISIS, kuma shi mutun ne da zai iya aikatawa. Ga shi kuma Turkiyya makwabciyar Syria ce.

Trump ya kara da cewa“ Sojojin mu za su dawo gida.” Da safiyar Lahadi, Trump ya ce da shi da Eldogan, sun tsara yanda Amurka za ta janye sojojinta, a wata hira ta wayar tarho da su ka yi mai tsawo.