Mutane Da Dama Sun Bata Sanadiyar Rugujewar Bene a Nairobi

Jami’an tsaro sun ce dama an riga an fidda kowa daga cikin ginin jim kadan kafin ya ruguje a daren jiya Litinin bayan da aka ga alamar tsagewa a bangaren ginin.

Galibin al’ummar Nairobi su miliyan 4 na zama ne a unguwannin marasa galihu ko na masu karamin karfi.

Da yake ana neman gidaje sosai a birnin, macutan magina a yawancin lokuta sukan kaucewa ka’idodin gini wajen girka gidajensu, abinda ke sa gidajen su yi rauni.

Ko a watan Afrilun da ya wuce, mutane 49 suka mutu a lokacin da wani bene mai hawa shida ya ruguje a arewa maso gabashin birnin na Nairobi bayan wani ruwan saman da aka yi.