Mr. P. ya nuna fushinsa ne a wani sakon Twitter da ya wallafa a ranar Lahadi inda ya ce ya zama dole a kawo karshen wannan nuna wariya da ake yi.
“Ya zama dole a kawo karshen wannan matsala ta nuna kabilanci da nuna wariya, Haba! Mene ne yake faruwa haka.” Mr. P. wanda a da yake waka da dan uwansa a P Square ya ce.
An samu rashin jituwa tsakanin matasan Yarbawa da na Hausawa a Sasha da ke birnin Ibadan a makon da ya gabata, lamarin da ya yi sanadiyyar asarar rayuka da dukiyoyi.
“Ni Igbo ne, matata Bayerabiya ce, a arewa na girma, a arewa na yi makaranta. Yau ina magana da harshen Hausa.” Mr. P. wanda aka haifa a birnin Jos na jihar Pilato da ke arewacin Najeriya ya kara da cewa.
A sakon nasa na Twitter, har ila yau mawakin ya yi amfani da wasu alamomi na emoji, wajen nuna bacin ransa kan abin da ke faruwa inda har ya saka maudu’in #StopThe BloodShed” – wato a dakatar da zub da jinin da ake yi.
Wannan rikici ya ja hankulan jama’a da dama musamman a arewacin Najeriya, lamarin da ya sa masu fada a ji suke ta kiran da a kai zuciya nesa.
Rikicin har ila yau ya sa hukumomin jihar sun saka dokar hana fita a yankin Akinyele da rikicin ya fi kamari.
