Manyan Masana 3 a sha’anin tsarin mulki sun shaidawa kwamitin majalisar wakilan Amurka cewa, shugaba Donald Trump ya aikata laifin da ya cancanci a tsige shi, ta hanyar tursasawa Ukrain ta gudanar da bincike da zai amfane shi a siyasance.
Farfesa a sha’anin shari’a na Harvard, Noah Feldman, ya fadawa ‘yan majalisar cewa, a yadda Trump ya bukaci Shugaban Ukraine Volodymyr Zelenskiy ya bude bincike a kan daya daga cikin manyan abokan hamayyar sa na Demokrats a zaben shekara ta 2020, kuma tsohon mataimakin shugaban kasa Joe Baiden, ya nuna karara cewa ya aikata babban laifi, wanda a ka tsara daga cikin laifukan da a ke tsige shugaban kasa kan su a kundin tsarin mulkin Amurka.
Ita kuwa Pamela Karlan, Farfesar shari’a a Stanford, cewa ta yi ya kamata a ce shugaban Amurka ya hana kasashen waje yin kutse a zaben Amurka, ba ya gayyato su ba. Ta bayyana bukatar Trump da ya yi wa Zelenskiy, a matsayin babban laifin amfani da ofishin sa ba bisa ka’ida ba.
A jawabin sa na budewa, wani Farfesan shari’a daga jami’ar North Carolina, Michael Gerhardt, ya shaidawa kwamitin shari’a na majalisar cewa, “idan har majalisar ta kasa tsige Trump a nan, to kuwa lalle yunkurin na tsigewar ya zama maras fa’ida, domin kuwa kundin tsarin mulki, ya yi haramcin kafa basarake a kasar Amurka. Ba wanda ya fi karfin doka, ko da kuwa shugaban kasa ne.”
‘Yan Republican masu goyan bayan Trump sun kira wani Farfesan Shari’a a jami’ar George Washington, Jonathan Turley, wanda shi kuma ya ce akwai rauni ga shaidun da ake yunkurin tsige Trump da su, da kuma kiyayya daga ‘yan Democrats domin tsige Trump.
Facebook Forum