A yau Alhamis Majalisar Dattawan Najeriya ta zartar da kudurorin haraji guda 4 da suka samu tsallakawa zuwa karatu na 2 ta hanyar kada kuri’ar murya.
A ranar 3 ga watan Oktoban da ya gabata Shugaba Bola Tinubu ya aikewa Majalisar Dokokin Najeriya da kudurorin sauye-sauyen haraji guda 4.
Matakin ya janyo cece-kuce inda gwamnonin jihohin arewa ke adawa da sauye-sauyen harajin.
Sakamakon damuwa da halin da ake ciki, fadar shugaban kasa ta bayyana cewa ba a tsara kudurorin domin wani yanki ba sai dai don a bunkasa Najeriya baki daya.
Majalisar Dattawa ta kuma zartar da kudirin kafa hadaddiyar hukumar haraji da kotun daukaka kara a kan haraji da hukumar karbar korafi da binciken laifuffukan haraji domin karatu na 2, a matsayin wani bangare na kunshin sauye-sauyen harajin gwamnatin Tinubu.
Dandalin Mu Tattauna