Kaftin din kungiyar Super Eagles Vincent Enyeama, ya yi magana kan abin da ya faru a lokacin da ya isa masaukin ‘yan kungiyar a kasar Belgium ranar Talata.
Mai tsaron gida na kungiyar kuma wanda yake kaftin din kungiyar ya isa kasar Belgium bayan wuce wa’adin da aka saka na ranar Litinin. Wasu rahotanni dai na cewa ya nemi izinin yin latti, biyo bayan bikin jana’izar mahaifiyarsa da ta mutu a Akwa Ibom.
Bayan isar sa ya yi kokarin yin bayani kan dalilin da ya sa ya yi latti, amma koch Oliseh ya kore shi daga Otal din da suke har ma ya kira dogarawan tsaron Otal su ka fita da shi.
Hukumar kwallon kafa ta Najeriya NFF ta shiga cikin maganar hakan ta sa Enyeama ya kwana a Otal din.
Kan wannan abu da ya faru Enyeama dai ya kafe wani bayani a shafinsa na Instagram inda yace, “bayan shekaru 13 ina yiwa kasata aiki da murmushi a fuskata, kuma ina yi ne da kauna a cikin zuciyata, da zubar da kwalla alokacin da aka samu nasara kan mu, da murna a lokacin da muka sami nasara, amma duk wannan ya tafi a banza a lokacin da dogarawan tsaro suka fitar da ni, zan iya daukar duk wannan amma ba zan iya butulci ga mahaifiyata ba.”
Har yanzu dai babu tabbacin ko Enyeama zai zabi ci gaba da wasa da kungiyarsa, bayan wannan rashin mutuncin da Sunday Oliseh ya yi masa.
