Kannywood tare da hadin gwiwar Amara Creative studios zasu fara daukar wani sabon fim mai suna “Bilkisu” . Shi dai wannan fim din na batun ilimin ‘ya mace ne.
Murtala Balarabe Baharu, wanda ya kasance daya daga cikin marubutan wannan fim din yace dalilin da ya sa aka tantance tsaffi da sabbin jaruman da zasu fito a fim din Bilkisu, shine fim dai mai nisan zangon ne na gidajen talabijin, kuma domin a fito da tsantsan al’adar Malam Bahaushe ne tun daga tushe.
Ya ce fim din Bilkisu fim ne da zai nuna rayuwar 'diya mace a al’adar Hausa, tun daga lokacin da ta tasa, zuwa lokacin da zata fara karatu, gwagwarmayar da take fuskanta har lokacin da zata kamala karatunta.
Ya kara da cewa fim din zai kuma yi duba kan irin kalubalen da mace ke fuskanta bayan kare karatu , neman aiki da kuma bukatuwar zama wata aba a al’ummarta.
Baharu ya ce mutane daga sassan daban daban da ke harshen Hausa ne suka zo domin a tantance su.
Daya daga cikin wadanda suka hallarci tantancewar malama Maryam Abubakar daga jihar Lagos ta ce ta hallarci taron ne domin ta bada ta ta gudumuwar, inda ta ke so ta fito a matsayin jaruma Bilkisu.
Facebook Forum