ABUJA, NIGERIA- Gwamnatin ta bayyana haka ne, biyo bayan fashewar wani bam a yankin karamar hukumar Kabala ta kudu a jihar Kaduna a ranar Lahadi, 27 ga watan Fubrairu 2022.
Kwamishinan tsaro da lamuran cikin gida na jihar Samuel Aruwan ne ya bayyana wannan ankararwa a sanarwar da ya fitar.
Sanarwar ta ce an shuka nakiyoyin a sassan taruwar jama’a irin makarantu, asibitoci, hotel-hotel, gidajen barasa, filayen shakatawa, gidajen abinci, tashoshin mota da wajajen ibada.
Gwamnatin ta bukaci masu fasa dutse su yi takatsantsan a filayen aikin su da gujewa barin nakiyoyin su fada hannun miyagun iri.
Hakanan sanarwar ta bukaci mutane su kai labarun wadanda ba su yarda da take-taken su ba ga jami’an tsaro, inda har a ka ba da lambobin waya da za a kira don ba da sanarwar gaggawa.
