Wani babban jami’in diplomasiyyar Amurka da ke kare ‘yancin yin addini, ya yi kira ga China da ta dakatar muzgunawar da take wa wasu mabiya addini.
Jakadan Amurka kan ‘yan cin yin addini na kasa da kasa, Sam Brownback, ya fadawa ‘yan jarida cewa “China tana fada ne tare da addini, amma wannan fadan ba za su yi nasara ba.”
“Jam’iyyar Kwaminisanci ta China ba ta amince ta kyale mutanenta su zabi abin da suke ganin turba ce mai kyau ga rayukansu, muna magana ne akan al’umar da jama’arta, ta haura biliyan daya, inji Brownback.
Ya kuma kara da cewa, wannan tafarki da hukumomin na China suka dauka, na nufin Musulmai ba za su iya ci gaba da sawa ‘ya’yansu suna irinsu Mohammed, sannan su ma mutanen Tibet da ke bin addinin Bhudda ba za su iya zaba ko su girmama sunayen shugabanninsu ba, kamar yadda suka saba yi na tsawon shekaru sama da dubu.
Brownback ya kara da cewa, anata lalata coci-coci sannan ana tilastawa wasu suna dasa na’urorin daukan hoto na sirri.
Facebook Forum