Masana tattalin arziki da kwararru a fannin hada-hadar kudi na ganin wannan kokari da bankin CBN ya yi bai hana matsalar canji tsakanin dalar Amurka da naira ba, hasali ma har yanzu farashin kayan masarufi na karuwa a kasuwanni.
Ya zuwa wannan lokacin, ana sayar da dalar Amurka daya a kan naira 750 a kasuwar bayan fage yayin da a banki kuma ake sayar da dalar kan naira 450, bambancin naira 300 kenan tsakanin banki da kasuwar bayan fage.
A hirar shi da Muryar Amurka, Umar Garkuwa, daya daga cikin manyan ‘yan canjin kudi a Abuja babban birnin tarayyar Najeriya, ya ce karyewar naira laifin babban bankin kasar ne ba laifin ‘yan canji ba.
Garkuwa ya ce matsalolin harkar canji a Najeriya ba kamar a wasu kasashen duniya ba ne, domin lamarin ya zama wata harka da wasu ‘yan kasar da kuma CBN suke amfani da ita wajen azurta kansu. Ya kara da cewa, kasuwar canjin kudin kasashen waje a Najeriya dabam ta ke kuma babu yadda za a magance lamarin.
A lokacin da shugaba Mohammadu Buhari ya karbi mulki ana canza dala daya akan naira 184 zuwa 185 amma yanzu ana sayen dala daya a kan Naira 750, a cewar Garkuwa.
A lokacin da ta ke bayani kan yadda canjin kudi ya shafi farashin kayayyaki a kasuwa, Madam Elizabeth Sudan, ta bayyana cewa, kudin kaya a kasuwanni ya karu, domin a kwanakin baya ta sayi fakitin sinadarin Maggi na dandanon miya kan naira 750 amma ya koma naira 800, buhun shinkafa ya tashi daga dubu 40 zuwa dubu 44, kuma ko ina aka je sai a ce dalar Amurka ta yi tsada.
A nashi bayanin, masanin tattalin arziki Yusha'u Aliyu, yana ganin akwai matsalar da ya kamata a magance idan bankin CBN ya kashe wadannan kudaden kuma darajar naira ba ta hau ba.
Yusha'u ya kara da cewa sai an duba wuraren da aka kashe dalar Amurka biliyan 11.42 sannan a duba yiwuwar tasirin kudin.
Sai dai darakta mai kula da bankuna a CBN Haruna Bala Mustapha, ya ce a garesu ma'aikatan CBN naira ba ta ci gaba da karyewa ba, domin su ba sa amfani da farashin bayan fage wajen yin canjin kudi, a saboda haka bankin CBN ya fito da tsare-tsare na bunkasa hanyoyin kudaden shiga daga kasashen waje.
Mustapha ya kuma ce idan kudaden shiga suka bunkasa, to dole ne darajar dalar Amurka da ma wasu kudade na kasashen waje su karye.
Abin jira a gani shi ne yadda wadannan makudan kudin dala biliyan 11.42 za su farfado da darajar naira a daidai lokacin da batun sauya kudi ya sa aka rufe kasuwanni a bangarorin kasar da dama.
Saurari cikakken rahoton Medina Dauda:
