Washington D.C. —
Jarumar Kannywood Halima Atete za ta amarce tare da angonta Mohammed Mohammed Kala.
Za a daura auren ne a ranar Asabar 26 ga watan Nuwamba a Maiduguri, babban birnin jihar Borno da ke arewa maso gabashin Najeriya.
Furodusa Abdulamart Mai Kwashewa ne ya wallafa hotunan masoyan biyu hade da katin gayyata.
“Allah ya tabbatar da Alheri Sarauniya @haleemaatete.” Abdulamart ya ce.
Jarumi Ali Nuhu ma ya wallafa hoton Atete hade da katin auren, a wani mataki na taya masoyan biyu murna.
Gabanin daurin auren, akwai shagulgula da wasanni da za a gudanar kamar wasan kwallo, Margi Day da dai sauransu kamar yadda katin gayyatan ya nuna.
