Ana Shirin Gudanar Da Sulhu A Rikicin Kasar Yemen

Wakilin Majalisar Dinkin Duniya na musamman kan rikicin Yemen, Martin Griffith, yana ziyara a kasar ta Yemen, domin share fagen tattaunawar zaman lafiya da ake shirin yi.

Ziyarar na zuwa ne, yayin da wani sabon fada ya barke a farkon makon nan a birnin Hodieda.

An shirya cewa, Griffith zai hadu da Jami’an Houthi da ke samun goyon bayan Iran, a wani yunkuri na shawo kan su da gwamnatin Yemen da ke samun goyon bayan Saudiyya, domin su hau teburin tattaunawa a kasar Sweden kafin karshen shekarar nan.

A ‘yan kwanakin nan, bangarorin biyu sun amince da gayyatar ta Griffith, amma rahotanni sun ce, barkewar sabon rikicin da aka samu a kwana nan, zai iya kawo cikas ga kokarin sulhunta bangarorin biyu.