Yau Labara, rana ta biyar kenan da wasu ma’aikatun gwamnati suka kasance a rufe ba tare da wata alama da ke nuna cewa za'a sasanta ba.

A jiya Talata Shugaban Amurka Donald Trump ya nanata matsayarsa, inda ya ce ayyukan wasu ma’aikatun gwamnatin za su ci gaba da kasancewa a tsaye cik, har sai an ba shi kudaden da zai gina katanga tsakanin Amurka da Mexico.

A lokacin wata tattaunawa da sojojin Amurka da suke kasashen waje, Shugaba Trump ya ce “ba zan iya fada muku yaushe za a bude ma’aikatun gwamnatin ba, zan iya cewa ba za a bude ba har sai an gina katanga.”

Duk da cewa babu wata hujja da ya gabatar, shugaba Trump ya kara da cewa, daruruwan ma’aikatan gwamnati da aka dakatar da su daga zuwa aiki sanadiyyar rufe ma’aikatun gwamnatin, su ma suna so a gina katangar.