Rundunar ‘yan sandan kasar New Zealand ta tura jami’anta zuwa wani Masallaci da ke yankin da ake kira Central Christchurch, inda rahotanni suka ce an kai harin bindiga.

Kafofin yada labaran kasar ta New Zealand, sun ruwaito cewa, an kai harin bindigar ne a yau Juma’a da rana, kuma an samu jikkata da dama.

Sai dai babu bayanai daga hukumomi da suka bayyana ko an samu asarar rayuka ko kuma an jikkata ne kawai a harin da aka kai Masallacin.

Wani da ya shaida lamarin, ya fadawa kamfanin dillancin labarai na Reuters cewa, ya ga mutum uku kwance a kasa kuma jini na kwarara daga jikinsu.

Haka zalika, wani shaida ya fadawa kamfanin dillancin labarai na Associated Press cewa, ya ga mutum uku da suka mutu.