Shugaban Amuraka Donald Trump, ya bukaci Syria, Rasha, da Iran da su dakatar da “jefa bama-bamai a Lardin Idlib da ke Syria.”

Trump ya bayyana hakan ne a wani sako da ya wallafa a shafinsa na Twitter a jiya Lahadi yana cewa: jefa bama-baman “yana hallaka fararen hula da ba su ji ba ba su gani ba.”

Ya kuma kara da cewa, “duniya na kallon wannan kisan gilla, mene ne dalilin yin haka? Me za ku amfana da shi! Ku daina!”.

Yayin wata ganawa da manema labarai a Fadar White House, Trump, ya yi nuni da kiran da ya yi a bara ga gwamnatin Syria da kawayenta, kan su daina yin yakin-ruddugu akan Lardin na Idlib saboda kada a jefa al’umar yankin cikin matsanancin hali.