Shugaba Donald Trump ya ce Amurka na iya cimma matsaya da kasar China a gobe, don warware rashin jituwar da ke tsakanin manyan kasashen mafiya karfin tattalin arziki a duniya, akan huldar kasuwanci.
Ya kuma zargi kasar China da cewa ita ce ba ta son bangarorin biyu su cimma matsaya.
A wasu jerin sakonni da ya wallafa a shafinsa na Twitter a yau Talata, shugaba Trump ya nuna cewa matakin da Amurka ta dauka a yanzu shi ne “matakin da ya fi dace wa fiye da duk matakin da za mu dauka.”
Ya kuma kara jaddada cewar karkashin mulkinsa, babu wata kasa da za ta sake kwarar Amurka, idan ana maganar kasuwanci.
Kalaman na Trump na baya bayannan, suna zuwa ne, bayan da ya kara yawan haraji akan kayan China na kimanin dalar Amurka billiyan $200 da ake shigowa da su Amurka, kana da kara harajin akan kayan Chinar da suka kai na kimanin dala billiyan $300.
Ita ma China ta rama da dora haraji akan kayan Amurka da ake shiga da su kasarta da suka kai na dala biliyan $60.
Facebook Forum