DandalinVOA ya karbi bakuncin Kashim Audu, daga kungiyar shirya fina finai ta Nollywood - jarumi kuma marubuci wanda ya ce yana samun nishadi wajen gudanar da ayyukansa a cewarsa domin yana fadakarwa game da wa’azantarwa a fina finansa.
Ya ce ya zo garin Kano domin wani yunkurin shirya bajen kolin 'yan fina-finai da yake shirin hadawa nan ba da jimawa ba a jihar Kaduna, wanda yayi wa lakabi da 'Kaduna Film Festival' wanda za’a yi a watan Satumba mai zuwa na tsawon kwanaki biyar.
Ya ce wannan shine karo na farko ko ma ace Irinsa na farko a Nijeriya, wanda zai hada dukkanin masana’antun shirya fina-finan Nijeriya, a cewarsa domin hadin kan 'yan Nijeriya, ta hanyar fina-finai, mussaman ma yadda ake samun rikice-rikice da rashin zaman lafiya da ake samu a wasu sassan kasar.
Ya ce taken Kaduna film festival shine Uniting Nigeria through film' – inda yake cewa ya lura ta fina-finai za’a iya hada kan 'yan kasa, duba da yadda fina-finai ke fadakarwa a hannu guda kuma suke wa’azantarwa.
Daga karshe ya kara da cewa a yayin baje kolin za’a ba wasu fina-finai lambar girma da wasu kyautuka na yabawa ayyukansu da ma jarumai.
Facebook Forum