A daren yau Talata ake sa ran shugaban Amurka Trump zai kaddamar da yakin neman zaben shi karo na biyo a birnin Orlando dake jihar Florida, amma tun a safiyar jiya Litinin wasu masoyansa suka kasa suka tsare, a bakin dakin taron Amway Center don samun wajen zama.

Kimanin mutane 100 ne suka taru a harabar wajen, wasu sun ce tun karfe 4 na assuba suke wajen, kuma da yawansu sun zo da runfuna da kujerunsu, abubuwan kwalama da na sha, kana sun kawo lema don maganin ruwan sama da zafin rana.

Da yawa daga cikin magoya bayan shi, sunce suna goyon bayan Trump ne akan tsarin shi na tattalin arziki, da kuma manufarsa akan bakin haure.