Hatsarin Kwale-Kwale A Delta Ya Hallaka Mutane 5 A Delta

Mutane 5 sun mutu, 6 sun jikkata sannan wasu 20 sun bata sakamakon wani mummunan hatsarin kwale-kwale daya afku a karamar hukumar Warri ta kudu a jihar Delta.

Kakakin rundunar ‘yan sandan jihar Delta Edafe Bright ya tabbatar da afkuwar lamarin, inda ya bayyana cewar mutane 6 da suka jikkata na samun kulawar likitoci a wani asibitin da ba’a bayyana ba a birnin Warri.

Mummunan hatsarin ya kunshi taho mu gama tsakanin wasu kananan jiragen ruwa masu gudun tsiya guda 2 dake fiton wasu iyalai dake dawowa daga bikin jana’iza.

A watan Oktoban daya gabata, dimbin mutane sun mutu a jihar Neja bayan da wani kwale-kwale ya kife saboda kazamin lodi. Kwale-kwalen na dauke ne da fiye da fasinjoji 300 sa’ilin daya kife a kogin Gbajibo dake karamar hukumar Mokwa ta jihar.

Kwale-kwalen ya taso ne daga garin Mundi zuwa Gbajibo bayan halartar bikin Maulidi sa’ilin da hatsarin ya afku.

Ku Duba Wannan Ma

Hatsarin Kwale-Kwalen Neja: Adadin Wadanda Suka Mutu Ya Karu Zuwa 24

Ku Duba Wannan Ma

Kwale-Kwale Ya Kife Da Mutum 300 A Neja

Makamancin wannan hatsari ya faru a jihar a watan Satumbar 2023 sa’ilin da wani kwale-kwalen dake dauke da fasinjoji 50 ya kife, inda ya hallaka mutane 24 dake kan hanyarsu ta zuwa gona domin girbi.