Daraktan mai kula da daukacin ‘yan wasa na hukumar kwallon kafa ta Najeriya Amodu Shuaibu da Koch din Super Eagles mai rikon kwarya Samson Siasia da mataimakinsa Salisu Yusuf da kuma Koch din Flying Eagles Emanuel Amuneke zasu gana a yau din nan.
A ganawar tasu zasu tattauna ne akan ‘yan wasan da ya kamata ayi amfani dasu ne a karawar da Najeriya zata yi da kasar Misira a garin Kaduna a ranar 25, ga wannan watan.
Najeriya zata karbi bakunci kasar ta Misira a zagayen farko inda ita ma Najeriya zata bakunci kasar ta Misira a sagaye na biyu ranar 29 ga wannan watan da muke ciki.
Kasar ta Misira a yanzu ita ke kan gaba a rukuninta na G, da maki shida, daga wasanin biyu, ita kuwa Super Eagle ke biye da ita da maki hudu.
‘Yan wasan gida na Super Eagle zasu hallara a sansanin da ake horas dasu kafin wadanda ke kasashen waje su iso.
