A lamba ta 3 cikin abubuwa goma da suka girgiza duniyar kwallon kafa a sheklarar 2014, a tantancewar editocin GOAL.COM, yadda Luis Suarez dan kasar Uruguay ya gantsara ma mai tsaron baya na Italiya, Giorgio Chiellini, cizo a karawar da kasashen biyu suka yi a gasar cin kofin duniya.
Wannan shi ne karo na uku da Luis Suarez ya danna hakorinsa a jikin wani dan wasa lokacin da ake buga kwallo, kuma a wannan karon, hukumar kwallon kafa ta duniya ta dakatar da shi na tsawon watanni 4, aka kuma ce lallai ya je ya ga likitan kwakwalwa.
Duk da haka, kasar Uruguay ta yi kukar cewa wata makarkashiya ce kasar Ingila ta kulla ta neman kunyata mata dan wasa da kuma kokarin ganin an cire kasar daga gasar cin kofin duniya.
Kuma duk da wannan abin kunya da yayi, kungiyar kwallon kafa ta FC Barcelona ta zare tsabar kudi har Euro miliyan 81 ta saye shi daga kungiyar Liverpool ta Ingila.
