A yau muna lamba ta 8 a cikin jerin abubuwa guda goma da suka girgiza duniyar kwallon kafa a shekarar 2014 kamar yadda editocin GOAL.COM suka tace suka zana.
A matsayi na takwas din kuwa, wasan nan ne da aka buga na cin League Cup a tsakanin Manchester United da MK Dons.
Akasarin masoya kwallon kafa a fadin duniya ma basu taba jin sunan wannan kungiya ta MK Dons ba, amma ta shiga fili ta lallasa Manchester United da ci 4-0.
Tun daga nan ne sabon manajan Manchester United, Louis Van Gaal ya fahimci cewa ba karamin aiki ne a gabansa ba idan yana son maido da martabar wannan kulob.
A bayan wannan abin kunya da suka yi a filin, Manchester United ta sayarda wasu ‘yan wasanta, ta bayar da aron wasu, ta sayi wasu, ita ma ta aro wasu.
A yanzu dai, Manchester United ta sake farfadowa tun bayan wannan abin kunya, kuma ta cira sama a teburin Firimiya Lig na Ingila.
