Hukumar kwallon kafa ta Najeriya, (NFF) ta bada tabbacin cewa ta samu amincewa data biya ‘yan wasan kungiyar kwallon kafa na Super Eagles, dalar Amurka $10,000, kowanne a matsayin alwus alwus na nasarar da suka yi na doke kasashen Zambia da Algeria, a fafutukar da suke yi na neman gurbi a gasar cin kofin kwallon kafa na duniya.
Koda yake za’a samasu kudaden ne a cikin ajiyarsu na banki, inda ake sa ran cewa za’a biyasu Naira dubu 350,000, wanda yake zaman kudin alwus na kwanakin da suka yi a sansanin horo na wasan da suka buga da Algeria, inda da ake biyansu Naira 20,000, yanzu an maida shi Naira 50,000.
Za kuma a biyasu kudi jirgi na zuwa da dawowa daga Legas zuwa Abuja, koda yake ba’a tabbatar ba ko a dalar Amurka ko kuma a Naira za’a biya kudaden kamar yadda ‘yan wasan suka bukata.
Najeriya, dai ta doke kasar Algeria, 3 da 1, a wasan da suka yi a Uyo babbar birnin jihar Akwa Ibom, wanda ya kara mata karfin guiwa wajen neman buga gasar cin kofin duniya wanda za’a buga a kasar Rasha.