Kocin Super Eagles na Najeriya, Sunday Oliseh na shirin fara zawarcin dan wasan gaba na Liverpool, Jordan Ibe, domin ya zo ya bugawa Najeriya kwallo.
Ibe, wanda mahaifinsa dan asalin Najeriya ne, ya sha takawa kasar Ingila wasanni a matakai daban- daban.
Sai dai kamar yadda rahotanni suka nuna Oliseh ya zaku ya sa dan wasan ya sauya sheka zuwa tawagar Super Eagles ba ta Three Lions da ya ke wakilta ba.
A wata ganawa da ya yi da 'yan jarida a makon da ya gabata, Oliseh ya fito karara ya nuna cewa yana bukatar zaratan 'yan wasa ne da za su iya kawo sauyi.
A yanzu Ibe, ya kasance yana bugawa kungiyar ta Reds wasa ne inda yanzu haka su ke ziyarar atisaye a nahiyar Asiya, hakan kuma ya sa sai Oliseh ya jira dan wasan ya dawo kasar Burtaniya kafin ya tunkare shi.
Oliseh wanda ya kai ziyara Nahiyar Turai, zai gana da Ibe domin ya nuna mai cewa yana da kyakyawan makoma a Najeriya fiye da Ingila, kamar yadda wani jami'i ya gayawa shafin wasanni na AfricanFootball.com.