Sabon shugaban Kungiyar kwallon kafa ta Wikki Tourist dake jihar Bauchi a tarayyar Najeriya Alh Balarabe Yusuf (Douglas) ya bukaci masu ruwa da tsaki a bangaren kwallon kafa na ciki da wajen jihar Bauchi su bada gudumawar su, wajen cigabar Kungiyar domin a gudu tare a tsira tare.
Balarabe Douglas ya bayyana hakanne bayan da aka tabbatar masa da matsayin shugaban Kungiyar ta Wikki Tourist.
Bayan haka yayi kira ga magoya bayan kwallon kafa na Wikki tourist musamman matasa da su guji dukkannin wasu abubuwan da ya kauce wa dokokin wasannin saboda cigaban Kungiyar.
Inda a kwananne aka ci tarar Kungiyar naira miliyan daya da rabi, saboda zargin da ake mata na kasa tsare magoya bayanta shiga fili a wasan da suka yi da Plateau United a filin wasa na tunawa da Sir Abubakar Tafawa Balewa Bauchi, inda aka doketa da ci daya da nema a wasan firimiya 2019/20.
A yanzu haka Wikki tana matsayi na 15 ne a teburin gasar Firimiya na bana, inda a wannan mako zata bakonci Kwara United domin fafatawa a wasan mako na 24.