Musa Muhammed kaftin ‘din Fying Eagles, ya bar sansanin horon ‘yan wasan dake birnin tarayya Abuja.
Koch ‘din matasan ‘yan kasa da shekaru 23 Samson Siasia, yace ‘dan wasan mai kare gida ya kama gabansa batare da gayawa kowa ba. ya tabbatar wa da ‘yan jarida haka ne a Abuja, inda yace, “Musa ya bar sansanin ba tare da fadawa kowa ba halin da yake ciki.”
Ya cigaba da cewa, “amma ina mai tabbatar muku ba sai mun tada hankalin mu ba, muna da isassun ‘yan wasa da zasu iya buga mana wasa mai kyau. Yaran na bukatar yin wasan da aka umarcesu kawai, ta hakane zamu sami nasarar gasar wasan da za’a yi, ina da tabbas kan hakan.”
An fuskanci cewa ‘dan wasan da wakilin sa Abba Mohammed, sunyi tafiya zuwa Germany domin saka hannun kan takardun komawar sa wani kulub ‘din da ba’a bayyana sunan sa ba.
An dai gayyaci Musa Muhammed yazo kungiyar dake da alama zata zama zakara nan gaba, kungiyar dai ta hada da kwararrun ‘yan wasa kamar su Mustapha Abdullahi, Taiwo Awoniyi, Benard Bulbwa da kuma mai tsaron gida Dele Alampasu.