Paul Pogba da Luke Shaw sun taimakawa kungiyar Manchester United wajen lashe wasan farko a gasar Premier ta Ingila, inda ta doke Leicester City da ci 2-1.
WASHINGTON DC —
Kungiyar kwallon kafa ta Manchester United ta fara gasar Premier ta Ingila da kafar dama.
Ta lallasa Leicester City da ci 2-1 a filinta na Old Trafford, a wasanta na farko, wanda har ila yau shi ne wasan farko a wannan kakar wasa ta 2018/2019 da aka fara bugawa a Ingila.
Kwallon farko ta zo ne daga Paul Pogba, wanda kasarsa Faransa ta lashe kofin duniya da aka kammala a Rasha a watan da ya gabata.
Pogba ya zira kwallon ne a minti na 3' sannan abokin wasansa, Luke Shaw ya kara wata kwallon a cikin minti na 83’.
An yi ta rade-radin cewa Pogba na yunkurin komawa kungiyar kwallon kafa ta Barcelona.
Dan wasan Leicester City Jamie Vardy ya rama kwallo guda ga kungiyarsa a cikin zangon karin lokaci inda aka tashi a wasan da ci 2-1.